DBH4ko ikasleek, proiektu astearen barnean, Irungo harrera sareko kide den Amets Arzallusekin solasaldia egiteko aukera izan dute gaur, martxoaren 22an. Berriketaldian migrazioa analizatu dute: alde batetik, migrazioaren egoera orokorraz aritu dira; bestetik, Irunera iristen diren migratzaileen egoera; eta, hirugarrenik, nola ez, irakurri berri duten Miñan liburuan agertzen den Ibrahimaren egoeraz.
Irungo harrera sarea, modu solidarioan, abandonatuta eta eskubiderik gabe iristen diren migratzaileei bidea errazteaz arduratzen dela azaldu die Ametsek: herriaren nondik norakoak azaldu (geltokiak, babeslekuak… non dauden); arropa, telefonoak zein beharko luketen hori eskaini; osasun laguntza luzatu; asilo eskaerekin lagundu… Izan ere, harrera sarearen ustez, pertsona guztiek dute harrera duina izateko eskubidea.
Bestalde, Miñan liburuaren inguruko galderak ere egin dizkiete ikasleek Amets Arzallus idazleari, protagonistaren, Ibrahimaren berri jakin nahi baitzuten.
Benetan solasaldi aberasgarria izan da guztiontzat! Eskerrik asko, Amets!
